Geet Gujarati

કારણ હાથવગું રાખીને

કારણ હાથવગું રાખીને, ખાલીપો બસ આવે,
સીધી સાદી એકલતાને, શણગારીને લાવે .

ઝીણાં ઝીણાં અરમાનોને, રોજ અરીસે રોપે,
દર્દ મળે તો પોતીકું જાણીને પ્રેમથી પોંખે,
તૂટેલા સપનાની કરચો, ચાર દીવાલે વાવે !

કારણ હાથવગું રાખીને, ખાલીપો બસ આવે.

નર્મ-મુલાયમ સર્પીલા, એકાંત મહીં ગાજીને,
ભર-બપ્પોરે ઠંડા-ઠંડા, મૌન થકી દાઝીને,
આ સમયના ઝાડ ઉપરથી, ક્ષણને તોડી ચાવે !

કારણ હાથવગું રાખીને, ખાલીપો બસ આવે.

મનનાં દ્વાર કર્યા મેં બંધ તો, ખખડાવે છે સાંકળ,
રાત દિવસ પડછાયો થઈને, ફરતો આગળ-પાછળ,
પરપોટાની વાત કરીને, રોજ મને એ તાવે !

કારણ હાથવગું રાખેને, ખાલીપો બસ આવે.

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.