Geet Gujarati

ગાંઠ બધી યે છૂટી. . .

ગાંઠ બધી યે છૂટી. . .
જીવ જરીક બંધાયો ત્યાં તો ભ્રમણાં તડાક તૂટી. .

કૈંક થવાની હોડમાં તું તો હોવું તારું ભૂલે,
વાત તણાં વૈભવથી તારું ક્યાંય હ્રદય ના ખૂલે,
સો ટચની આ શીખ સમયની સૂરજ સાખે ઘૂંટી. .

તો, ગાંઠ બધી યે છૂટી.

મેઘધનુષી આભાની છે પળ બે પળની માયા,
અંધારાનો પગરવ સૂણી પડછાયા સંતાયા,
સંબંધોની કાચ સપાટી ફૂંક થકી ગઇ તૂટી. .

તો, ગાંઠ બધી યે છૂટી.

હાથ અને હૈયાનું મળવું થઇ ગ્યું આમ અનોખું,
હોવું મારું ગૌણ ગણી ને, એનું હોવું પોંખું,
ઢીલ સમજને દઇ ઉકેલી સઘળી આંટીઘૂંટી. .

તો, ગાંઠ બધી યે છૂટી.

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.