Geet Gujarati

બરછટ હતી ને હતી

બરછટ હતી ને હતી સૂનમૂન હથેળી એમાં ઊગી ગઈ લાગણી કંઈ કૂણી..
ટેરવાંની વાત જરા સૂણી.

જરૂરત પડી ત્યાં તો ખુલ્લી હથેળીએ દઈ દીધી રસવંતી તાળી
આંગળી ચીંધીને કદીક દિશા બતાવી કદીક મુઠ્ઠી વાળીને વેળા ખાળી

હોવું હૂંફાળું કે શીળું થઈ જાય ત્યાં રેખાઓ થઈ જાતી ઋણી
ટેરવાંની વાત જરા સૂણી..

અડકે છે એવું કે હૈયું હઠીલું યે પળમાં થઈ જાય એને વશ
સપનાં સજીવન કરે છે એ ટેરવાં તો જાળવે છે જીવવાનો રસ

હાથવગી કળ અને કૂંચીથી ચેતનાની ધખતી રહે છે જાણે ધૂણી
ટેરવાંની વાત જરા સૂણી..

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.