Gazal Gujarati

હોય છે એવો ય ગાળો

હોય છે એવો ય ગાળો હોય છે !
આ સમય જાણે નિભાડો હોય છે !

સ્હેજ નમતું જોખ તો સમજાશે કે,
વ્હેંત છેટે સાચો તાળો હોય છે !

આયનાની સરભરાથી નહિં પૂરાય,
તારી અંદર જે તિરાડો હોય છે !

કૂંપળો કંઈ એમ તો ફૂટે નહીં,
પાનખરનો એમાં ફાળો હોય છે !

ખુદ્દની સાથે દ્વંદ્વ જ્યાં ચાલ્યા કરે,
મન-મગજ એવો અખાડો હોય છે !

એ મને લઈ જાય છે, મારા સુધી,
ખાલીપો મારો રૂપાળો હોય છે !

હે હ્રદય ! આ પ્રેમ છે, સંભાળજે. .
સાવ સીધી ત્યાં કરાડો હોય છે !

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.