Gazal Gujarati

આ તર્ક ને વિતર્ક

આ તર્ક ને વિતર્ક જરીવાર હોય છે !
ને, મૌનનો પ્રભાવ લગાતાર હોય છે !

ઉત્તર બધાયે એના વજનદાર હોય છે,
ખાલીપો એ રીતે તો અસરદાર હોય છે !

બસ, આપણાં જ આંખ અને કાન બંધ છે,
બાકી તો, આપણાંમાં અમલદાર હોય છે !

તું કોણ છે ? નો પ્રશ્ન અરીસો તને પૂછે,
જાગી જવાની ક્ષણનો એ અણસાર હોય છે !

આ રોજની કસોટીથી સાબિત થયું. . સમય,
થોડો-ઘણો તો તું ય તરફદાર હોય છે !

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.