Gujarati

હા, હશે ક્યાંક અંતરાય હશે

હા, હશે ક્યાંક અંતરાય હશે.
શક્ય છે એ સમયનો ન્યાય હશે.

આટલી વાતે મારું ધૈર્ય ટક્યું,
કે, સમય પાસે તો ઉપાય હશે.

પાન પીળા ફરજ નિભાવી ખર્યા,
એમાં સામેલ આ હવા ય હશે.

રંગ જોઈને કોણ માની શકે ?
સૂર્યને આપી ત્યાં વિદાય હશે.

સ્હેજ નોખી રીતે વિવાદને જો,
આગવી ને અલગ એ રાય હશે.

મારી આ તાજગીના મૂળમાં તો,
જે હ્રદયમાં છે એની ઝાંય હશે.

આ તમારા વલણથી લાગે છે કે,
લાગણી કે લગાવ ત્યાં ય હશે.

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.