Gujarati

સ્થિતિ આ સંબંધમાં સહેવાય નહિં

સ્થિતિ આ સંબંધમાં સહેવાય નહિં,
હોય આંધણ ને કશું ઓરાય નહિં !

એટલી હળવાશ પણ શું કામની ?
તાગ તળિયાનો કદી લેવાય નહિં !

લ્યો, પુરાવો મારી ઊંચી પ્હોંચનો,
મારાથી મારા સુધી પ્હોંચાય નહિં !

આ ગ્રહોની ચાલથી સાબિત થયું,
આજમાં કૈં કાલથી રહેવાય નહિં.

આટલી સમજણથી બસ, ડૂમો થયો,
નેવું થઈ ને આંખથી ચૂવાય નહિં.

તું વળાંકો ને વમળને આમ જો –
પાનખર વિણ ડાળથી કોળાય નહિં.

સાચવી લેજે જણસની જેમ બસ,
બંધ મુઠ્ઠી ક્યાંય જો ખોલાય નહિં.

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.