Gujarati

ભીતરી સૌ રંગ ખિલતા હોય છે

ભીતરી સૌ રંગ ખિલતા હોય છે સહવાસમાં
સૂર્યસમ એથી દિસે છે ઓસબિંદુ ઘાસમાં.

ઐ ઉદાસી, કેટલો છે જોઈ લે તારો પ્રભાવ,
ભીડમાં પણ તું મને વર્તાઈ શ્વાસોશ્વાસમાં. *

પાંચમાં પૂછાવા શું સમજણ જરૂરી હોય છે ?
ક્યાં સમજ છે, વૃક્ષને કૈં આમ અથવા ખાસમાં.

આ દલીલો, દાખલાથી પાર સઘળું નહિં પડે,
નાવ તરતી મૂકવાની હોય છે વિશ્વાસમાં.

હાથ હેઠા ના પડ્યા, આ વાત જાણી ત્યારથી,
કેટલી સંભાવના છે બીજમાં ને ચાસમાં !

સ્થાન ખાલીપાનું રાખ્યું મેં સવાયું કેમ કે –
હું મને જોઈ શકું છું નોખા એ અજવાસમાં.

આ સમય, સંજોગ સામે શું વધારે થઈ શકે ?
જીવને રાખ્યો, નદીની જેમ બસ ઉલ્લાસમાં.

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.