Gujarati

કાં લાગણી, કાં વેદના

કાં લાગણી. કાં વેદના, ચડતર મળે.
અપવાદથી ખાતાવહી સરભર મળે !

તારી કને પથ્થર સરીખા પ્રશ્ન ને,
મારી કનેથી ફૂલ સમ ઉત્તર મળે !

મનમાં સતત ગુલમ્હોરને ઘૂંટ્યા કરું,
નિંશ્ચિંત છું, ફાગણ મળે, ચૈતર મળે !

છે સાર મારી જાતનો બસ આટલો –
દુઃખો સતત ને સુખ મને પળભર મળે !

અસ્તિત્વ મારું દંભ છે, સાબિત થયું,
દર્પણમાં આ ચ્હેરો જુદો નહિંતર મળે ?

એથી ગઝલને નોતરું છું જીવથી,
કે, શબ્દરૂપે આખરે ઈશ્વર મળે !

~ લક્ષ્મી ડોબરિયા

Leave a Reply

This site uses Akismet to reduce spam. Learn how your comment data is processed.